PiSiu Kalaallit Nunaanni Brugsenilu suleqatigiinnerisigut ukiut tamaasa iliuutsimut pinerlutsaaliuitsinermik suliaqarnermi malunnaatilimmik sunniuteqarsimasumut PiSiu nersornaasiisarpoq. Nersornaasiinermi PiSiup Kalaallit Nunaanni Brugsenillu piumassutsiminnik suliaqartorpassuit, suliarpassuit suliniuterpassuillu, ullut tamarluinnaasa Nunatsinni pinerluttarnerup pinaveersaartinnissaanut pingaaruteqartorujussuit, nersorniarusuppaat.
Ukiut tamaasa PiSiu Kalaallit Nunaanni Brugsenilu nersornaasigassanik innersuussisarput, PiSiup nersornaasiuttagaanik tunniussinissamut toqqaanissami peqataasussanik. Nersornaasiuttakkamik pissarsisussatut inaarutaasumik aalajangiineq tamanut ammasumik, kalaallit innuttaasut akornanni, toqqaasitsinikkut pisarpoq.
PiSiup nersornaasiuttagaanik pissarsisutut ajugaasoq 20.000 koruuninik tunineqassaaq kiisalu nalunaaquttap akunnerini 40-ni PiSiumiit siunnersorneqarnissamik malitseqassalluni.
Taamaalillutit kikkut suliniutitik pillugit akissarsisinneqassanersut nersorniarneqassanersullu aalajangeeqataaffigisinnaavat. PiSiup nersornaasiuttagaa ukiut tamaasa tunniunneqartarpoq, taamaammat nuannarinerpaasavit toqqarnissaanut periarfissaq alaatsinaaguk!
Siusisunnerusukkut nersornaatisisut
PiSiup Nersornaasiuttagaa 2026 – Kristine Johanne Høegh
Kristine Johanne Høegh – aammattaaq Johamik ilisarisimaneqartoq – Qaqortumi angerlarsimaffeqanngitsunik inuuniarnermikkullu atugarliortunik piumassutsimigut sullissiuarnini pillugu 2026-mi PiSiup Nersornaasiuttagaanik pissarsisuuvoq. Suliniarnera ilaatigut Qaqortumi angerlarsimaffeqanngitsunik inuuniarnermikkullu atugarliortunik qasusuilluni ikiuiuarneranik imaqarpoq, ilaatigut namminersortunut suliffeqarfinnullu ikiortissarsiornikkut, atisanik katersinikkut, angerlarsimaffimmut pequtinik katersinikkut aammalu nerisassanik kissartutortitsinikkut. Aammattaaq innuttaasut pisortanik naapitsineranni Joha tapersersuisarpoq, aammalu inuunermi atugarisaannik pitsanngorsaaqataajuarpoq saniatigullu nuannaarnermik neriunnermillu tunisiuarluni.
PiSiup Nersornaasiuttagaa 2025 – Sømandshjemmet
Sømandshjemmet 2025-mi PiSiup nersornaasiuttagaanik pissarsisuuvoq Nunatsinni atugarliortut pillugit piumassutsiminnik sivisuumillu suliniuteqartuarsimanerat pillugu. Sulinerminni ilaatigut nunatsinni inissiisarfimmiittunik ataasiakkaaraluni oqaloqatiginnittarput aammalu sumiiffimminni peqatigiiffiit suleqatigalugit angerlarsimaffeqanngitsunut nerisassanik agguaasarlutik. Inunnut inuuniarnerminni sorsuuteqartunik anersaartulaarfeqartitsisarput aammalu tapersersuinermikkut sammisaqartitsisarnermikkullu pinerlutsaaliuisitsinermik suliaqarnermi pingaarutilimmik inissisimallutik.
PiSiup Nersornaasiuttagaanik 2024-mi pissarsisoq – Emil Krogh
Emil Krogh 2024-mi PiSiup nersornaasiuttagaanik pissarsisuuvoq kajummissutsimigut Nanortalimmi meeqqanut inuusuttuaqqanullu sunngiffimmi sammisaqartitsisarnini pillugu. Emil maligassiuisuuvoq inuusuttuaqqanut inuunermi unammillernartunik aqqusaagaqaraangata pingaartumik isumalimmik sammisaqartitsisarnermigut inuttullu tapersersuisarnermigut. Pimoorussinera Nanortalimmi inuusuttuaqqanut toqqissisimatitsinissamut pingaaruteqarluinnarpoq.
PiSiup Nersornaasiuttagaanik 2023-mi pissarsisoq – Siu-Tsiu
Siu-Tsiu 2023-mi PiSiup nersornaasiuttagaanik pissarsisuuvoq Tasiilami inuusuttunut ilinniagaqanngitsunut imaluunniit suliffeqanngitsunut pinerlutsaaliuisitsilluni suliaqartarnermigut. Siu-Tsiup suliniutit soorlu Tasiilaqs Have aqqutigalugu inuusuttunik atorfinitsitsisarpoq pikkorissaallunilu, tassani inuusuttut naatitassani inerisitsisarput sumiiffigisaanni tuniniarneqartartunik. Tamatumani inuusuttut piginnaasaqalerlutillu misilittagaqalersarput sulilernissaminnut imaluunniit ilinniagaqalernissaminnut siuarsartarlutik, aammalu pinerluttalernissaraluartik annikillisartarlugu. 2023-p kingorna Siu-Tsiu allinikuuvoq maannalu Qaqortumi suliniutinik aallartitsinikuulluni.
Senest opdateret 26-05-2026